Liga e Kombeve/ Shqipëria mbyll përgatitjet në Helsinki, Maran gati për duelin me Finlandën

Kombëtarja shqiptare ka mbyllur përgatitjet për sfidën e radhës në Ligën e Kombeve, teksa kuqezinjtë do të përballen nesër me Finlandën në transfertë.
Ekipi i drejtuar nga Rolando Maran zhvilloi seancën e fundit stërvitore në Helsinki, ku fokusi kryesor ishte te përgatitja taktike për përballjen ndaj finlandezëve. Futbollistët zhvilluan ushtrime fizike, punuan mbi skemat e lojës dhe provuan edhe goditjet standarde.
Sipas informacionit të bërë publik nga Departamenti i Komunikimit në FSHF, trajneri Maran ka pasur në dispozicion pjesën tjetër të grupit për përgatitjet e fundit, ndërsa mesfushori Luis Hasa nuk ndodhet në Helsinki.
Hasa, i cili pati probleme me temperaturën e lartë, është rikuperuar dhe aktualisht ndodhet në Tiranë, ku ka nisur një program të personalizuar stërvitor pranë Klinikës së Kombëtares. Ai pritet të jetë i gatshëm për ndeshjen e fundit ndaj San Marinos, që do të luhet më 6 tetor në stadiumin “Air Albania”.
Përballja me Finlandën do të zhvillohet nesër në orën 15:00, në stadiumin “Helsinki Olympic”, dhe për Shqipërinë do të jetë një tjetër test i rëndësishëm në këtë edicion të Ligës së Kombeve.
Kuqezinjtë synojnë të zhvillojnë një paraqitje sa më të mirë në transfertën finlandeze, ndërsa Maran ka përgatitur skuadrën për një ndeshje që pritet të kërkojë përqendrim maksimal dhe disiplinë taktike.
Pas përballjes me Finlandën, Shqipëria do ta mbyllë këtë seri ndeshjesh me sfidën ndaj San Marinos më 6 tetor në Tiranë.